නුවරඑළිය රෝහලේ තෙදින අක්ෂි ශල්‍යකර්ම කඳවුරෙන් රෝගීන් 600 සිට 700 දක්වා පිරිසකට පෙනීම යළි ලබාදීමේ මෙහෙයුමක්.

www.bbcmirror.lk

www.Lankawebnews.lk

මාධ්‍යවේදී  ආර්.එෆ්.එම්.සුහෙල් – නුවරඑළිය

ඇසේ සුද ඉවත් කිරීමේ ශල්‍යකර්ම සඳහා දිගුකාලයක් පොරොත්තු ලේඛනවල රැඳී සිටි රෝගීන් 500ත් 600ත් අතර පිරිසකට ශල්‍යකර්ම සිදුකිරීමේ අරමුණින් නුවරඑළිය දිස්ත්‍රික් මහ රෝහලේදී ක්‍රියාත්මක තෙදින විශේෂ අක්ෂි ශල්‍යකර්ම කඳවුරේ පළමු දිනය වූ ඊයේ (20) රෝගීන් 200 දෙනකුට ශල්‍යකර්ම සිදුකර තිබේ.

එහි දෙවැනි දිනය වන අද (21) රෝගීන් 300 දෙනකුට ශල්‍යකර්ම සිදුකිරීමට අවශ්‍ය කටයුතු සූදානම් කර ඇති බව රෝහල් අධ්‍යක්ෂවරයා පැවසීය. තෙවැනි දිනය වන හෙට (22) ද රෝගීන් 200ත් 300ත් අතර පිරිසකට ශල්‍යකර්ම සිදුකිරීමට සැලසුම් කර තිබේ.

ශ්‍රී ලංකා අක්ෂි වෛද්‍ය විශේෂඥයන්ගේ විද්‍යාලයේ සංවිධානයෙන්, නුවරඑළිය දිස්ත්‍රික් මහ රෝහලේ සහයෝගයෙන් සහ ජනාධිපති අරමුදලේ මූල්‍ය අනුග්‍රහයෙන් මෙම විශේෂ වෛද්‍ය වැඩසටහන ක්‍රියාත්මක කෙරේ.

නුවරඑළිය දිස්ත්‍රික් මහ රෝහලේ අධ්‍යක්ෂ වෛද්‍ය වයි. එම්. සුනිල් සෙනරත් යාපා මහතාගේ ප්‍රධානත්වයෙන් සංවිධානය කර ඇති මෙම වැඩසටහනේ දෙවැනි දින අවස්ථාවට නුවරඑළිය දිස්ත්‍රික් පාර්ලිමේන්තු මන්ත්‍රී සහ අධ්‍යාපන හා උසස් අධ්‍යාපන නියෝජ්‍ය අමාත්‍ය වෛද්‍ය මධුර දහම් බණ්ඩාර සෙනෙවිරත්න මහතා, නුවරඑළිය දිස්ත්‍රික් ලේකම් තුෂාරි තෙන්නකෝන් මහත්මිය සහ රෝහලේ හිටපු අධ්‍යක්ෂවරයකු මෙන්ම වත්මන් ඌව පළාත් සෞඛ්‍ය සේවා අධ්‍යක්ෂ වෛද්‍ය මහේන්ද්‍ර සෙනෙවිරත්න මහතා ඇතුළු පිරිසක් එක්ව සිටියහ.

නුවරඑළිය දිස්ත්‍රික්කයේ වතුකරයේ සහ දුෂ්කර ග්‍රාමීය ප්‍රදේශවල ජීවත්වන ජනතාවට විශේෂඥ අක්ෂි වෛද්‍ය සේවා ලබාගැනීමේදී ආර්ථික හා ප්‍රවාහන දුෂ්කරතාවලට මුහුණදීමට සිදුවේ. විශේෂයෙන් වයෝවෘද්ධ පුද්ගලයන් අතර බහුලව දක්නට ලැබෙන ඇසේ සුද රෝගය හේතුවෙන් පෙනීම ක්‍රමයෙන් දුර්වල වන අතර, එය ඔවුන්ගේ දෛනික කටයුතු සහ ස්වාධීන ජීවිතය පවත්වාගෙන යෑමට ද බාධාවක් වේ. එවැනි පසුබිමක විශේෂඥ වෛද්‍ය කණ්ඩායම් සහ රෝහල් සම්පත් ඒකාබද්ධ කරමින් කෙටි කාලයක් තුළ රෝගීන් විශාල පිරිසකට ශල්‍යකර්ම සිදුකිරීමේ වැඩසටහන් ජනතාවට සැලසෙන වැදගත් සෞඛ්‍ය සහනයකි.

නුවරඑළිය මහ රෝහලේ අක්ෂි ශල්‍යකර්ම සේවාවට ද දශක ගණනාවක ඉතිහාසයක් පවතී. 2007 වසරේදී අක්ෂි ශල්‍ය වෛද්‍ය විශේෂඥ වෛද්‍ය ප්‍රියංග ඉද්දවෙල මහතා නුවරඑළිය මහ රෝහලට පත්වීමෙන් අනතුරුව, රෝහලේ අක්ෂි ඒකකය හා සම්බන්ධ සමාජ සංවිධානවල සහයෝගයෙන් ඇසේ සුද ඉවත් කිරීමේ ශල්‍යකර්ම වැඩසටහන් පුළුල් කිරීමට කටයුතු කර තිබේ. එහි ප්‍රගතියක් ලෙස 2008 ජුනි මාසය වන විට වයෝවෘද්ධ රෝගීන් 209 දෙනකුගේ ඇසේ සුද ඉවත් කිරීමේ ශල්‍යකර්ම සිදුකර තිබූ බව පර්යේෂණ වාර්තාවල සඳහන් වේ.

කෙසේ වෙතත්, 2023 වසරේදී නුවරඑළිය දිස්ත්‍රික් මහ රෝහලේ ඇසේ සුද ඉවත් කිරීමේ ශල්‍යකර්මවලින් පසුව භාවිත කළ ඖෂධයක ගුණාත්මකභාවය සම්බන්ධයෙන් මතුවූ ගැටලුවක් හේතුවෙන් රෝගීන් පිරිසකගේ පෙනීම අහිමිවීම හෝ බරපතළ ලෙස දුර්වල වීමේ සිදුවීමක් වාර්තා වීමත් සමඟ එම රෝහලේ අක්ෂි ශල්‍යකර්ම සේවාව පිළිබඳව ජාතික මට්ටමේ අවධානයක් යොමුවිය. ඒ සම්බන්ධයෙන් සිදුකළ විමර්ශනවලින් අනතුරුව බලපෑමට ලක්වූ රෝගීන් 17 දෙනකුට වන්දි ලබාදීම සඳහා 2025 වසරේදී කැබිනට් අනුමැතිය ද හිමිවිය.

එම අත්දැකීමෙන් පසු රෝගී ආරක්ෂාව, ඖෂධවල ගුණාත්මකභාවය සහ ශල්‍යකර්ම සේවාවන්හි විශ්වාසනීයත්වය තහවුරු කිරීමේ වැදගත්කම තවදුරටත් ඉස්මතු වී තිබේ. එබැවින් මෙවැනි විශේෂ ශල්‍යකර්ම වැඩසටහන් ක්‍රියාත්මක කිරීමේදී රෝගීන්ට ආරක්ෂිත හා ගුණාත්මක ප්‍රතිකාර ලබාදීම කෙරෙහි ද විශේෂ අවධානයක් යොමු කිරීම අත්‍යවශ්‍ය වේ.

ඇසේ සුද ඉවත් කිරීමේ ශල්‍යකර්මයක් මගින් පෙනීම යළි ලබාගැනීම රෝගියකුගේ දෘෂ්ටි හැකියාව යථා තත්ත්වයට පත්කිරීමට පමණක් සීමා නොවේ. එමගින් ඔවුන්ගේ ස්වාධීනත්වය, දෛනික ජීවිතය සහ සමාජීය ක්‍රියාකාරීත්වය යළි ගොඩනඟා ගැනීමට ද අවස්ථාව සැලසේ. ඒ අනුව නුවරඑළිය දිස්ත්‍රික් මහ රෝහලේදී ක්‍රියාත්මක මෙම තෙදින විශේෂ අක්ෂි ශල්‍යකර්ම වැඩසටහන පොරොත්තු ලේඛනවල සිටින රෝගීන්ට සහනයක් සැලසීමේ වැදගත් සෞඛ්‍ය සේවා මෙහෙයුමක් ලෙස සැලකිය හැකිය

Spread the love

Leave a Reply

Your email address will not be published. Required fields are marked *