ඊශ්රායල පුරවැසියන්ට මාලදිවයිනේ දොර වැසේ ජනාධිපති මුයිසුගේ තීරණය ලෝකයේ අවධානයට
www.bbcmirror.lk
www.Lankawebnews.lk
මාධ්යවේදීනි ෆාතිමා සෆාන්
මැදපෙරදිග ගාසා අර්බුදය පසුබිම් කරගෙන, මාලදිවයින විසින් ගත් අලුත් තීරණයක් මේ වනවිට ලෝක දේශපාලන වේදිකාවේ දැඩි කතාබහට ලක්ව තිබෙනවා. මාලදිවයිනේ ජනාධිපති මොහොමඩ් මුයිසු විසින් එරට ආගමන-විගමන නීතියට නව සංශෝධනයක් අනුමත කරමින් ඊශ්රායල විදේශ ගමන් බලපත්ර (Israeli Passport) හිමියන්ට මාලදිවයිනට ඇතුළු වීම නිල වශයෙන් තහනම් කර තිබෙනවා.
මාලදිවයින් පාර්ලිමේන්තුව මෙම යෝජනාව ඒකමතිකව සම්මත කර ඇති අතර, එය අනුමත කිරීමෙන් පසු ජනාධිපතිවරයාගේ අත්සනත් සමඟ නව නීතිය ක්රියාත්මක වී තිබෙන බව වාර්තා වේ. මාලදිවයින් රජය සඳහන් කරන්නේ, පලස්තීන ජනතාවට එරෙහිව ඊශ්රායලය විසින් සිදුකරන බව කියන අඛණ්ඩ හමුදා ක්රියාමාර්ග සහ අත්යචාරයන්ට විරෝධය පළ කිරීමක් ලෙස මෙම තීරණය ගත් බවයි.
කෙසේ වෙතත්, ඊශ්රායල රජය මෙම සියලුම “ජන සංහාර” චෝදනා ප්රතික්ෂේප කරමින් කියා සිටින්නේ තමන් ක්රියාත්මක කරන්නේ ත්රස්තවාදයට එරෙහි ආරක්ෂක මෙහෙයුම් බවයි.
මෙම තීරණය මාලදිවයින් සහ ඊශ්රායලය අතර සම්බන්ධතා දිගු කලක සිට තිබූ උණුසුම් තත්ත්වයක තවත් පියවරක් ලෙස දක්නට ලැබේ. 1974 වසරේද මාලදිවයින ඊශ්රායලය සමඟ තිබූ රාජ්ය තාන්ත්රික සබඳතා අත්හිටුවූ අතර, 2014 වසරේදී ඊශ්රායල නිෂ්පාදන වර්ජනය කරන බවත් ප්රකාශ කර තිබුණා.
සංචාරක කර්මාන්තය මාලදිවයින් ආර්ථිකයේ ප්රධාන ආදායම් මාර්ගය වන අතර, එරට දළ දේශීය නිෂ්පාදිතයෙන් සම්පූර්ණයෙන්ම සලකා බැලූ විට සංචාරක ව්යාපාරය 20%කට අධික ප්රමාණයක් ලබා දෙයි. 2023 වසරේදී ඊශ්රායල ජාතිකයින් 11,000කට අධික පිරිසක් මාලදිවයිනට සංචාරය කළද, ගාසා යුද්ධය පසුබිම් කරගෙන 2024 වසරේදී එම සංඛ්යාව දැඩි ලෙස පහත වැටී ඇති බවද වාර්තා වේ.
මෙම තහනම පිළිබඳව ප්රතිචාර දක්වමින් ඊශ්රායල විදේශ අමාත්යාංශය තම පුරවැසියන්ට මාලදිවයිනට සංචාරය කිරීමෙන් වළකින ලෙසත්, දැනට එහි සිටින අය හැකි ඉක්මනින් රටෙන් පිටව යා යුතු බවත් උපදෙස් ලබා දී තිබෙනවා.