මහා සංඝ රත්නය සහ ජනපති අතර අද විශේෂ සාකච්ඡාවක්
www.bbcmirror.lk
www.Lankawebnews.lk
මාධ්‍යවේදීනි ෆාතිමා සෆාන්
ත්‍රෛනිකායික මහානායක ස්වාමීන් වහන්සේලා නියෝජනය කරන මහා සංඝරත්නය හා ජනාධිපති අනුර කුමාර දිසානායක මහතා අතර සාකච්ඡාවක් අද (08) දිනයේ පැවැත්වීමට නියමිතය.
රජයේ ප්‍රවෘත්ති දෙපාර්තමේන්තුව නිවේදනය කළේ, ත්‍රෛනිකායික මහානායක ස්වාමීන් වහන්සේලා විසින්, අධිකරණ තීන්දුවක් ප්‍රකාරව බන්ධනාගාර ගත කෙරුණු පූජ්‍ය ගලගොඩඅත්තේ ඥානසාර ස්වාමීන් වහන්සේ ගිහි වස්ත්‍ර සහිතව අධිකරණය වෙත ඉදිරිපත් කිරීම සම්බන්ධව බන්ධනාගාර කොමසාරිස් ජනරාල්වරයා වෙත ලිපියක් යොමු කිරීමට අදාළව මෙම සාකච්ඡාව පැවැත්වීමට නියමිත බවය.
ඒ අනුව අදාළ සාකච්ඡාව අද පස්වරු 1ට ජනාධිපති ලේකම් කාර්යාලයේ දී පැවැත්වීමට නියමිතය.
පුජ්‍ය ගලගොඩඅත්තේ ඥානසාර හිමියන්ට ගිහි වස්ත්‍ර අන්ඳවා අධිකරණය වෙත ඉදිරිපත් කිරීම සම්බන්ධයෙන් ත්‍රෛනිකායික මහානායක හිමිවරුන් විසින් බන්ධනාගාර කොමසාරිස් ජනරාල්වරයා වෙත ඊයේ (07) ලිඛිත දැනුම්දීමක් සිදුකරනු ලැබීය.
භික්ෂුවකගේ චීවරය ඉවත් කිරීම හෝ පැවිදිභාවය අහෝසි කිරීම හුදෙක් රාජ්‍ය පරිපාලනමය හෝ බන්ධනාගාර රෙගුලාසියකට සීමා වූ කරුණක් නොවන අතර එය මහි සංඝ රත්නයට අයත් වන ශාසනික කාර්යයක් බව ත්‍රෛනිකායික මහානාහිමිවරු පෙන්වා දෙති.
ගලගොඩඅත්තේ ඥානසාර හිමිගේ භික්ෂූත්වය ඡෙදනය වන පාරාජිකා ආපත්තියකට පත්ව ඇති බවට හෝ චීවරයෙන් නෙරපිය යුතු බවට සංඝ සභාව මඟින් කිසිදු තීරණයක් ගෙන නොමැති අවස්ථාවක බන්ධනාගාර පරිපාලනය මඟින් එවැනි ක්‍රියාමාර්ගයක් ගැනීම සමස්ත සම්බුද්ධ ශාසනේය පැවැත්ම අභියෝගයට ලක්කිරීමට හේතුවන අතරම බෞද්ධ සම්ප්‍රදායට සිදුවන හානියක් බව ද අදාළ ලිපිය මඟින් දැනුම්දී තිබේ.
අධිකරණය මඟින් වරදකරු කරන ලද යම් භික්ෂුවකගේ භික්ෂූත්වයට අදාළ කරුණු සම්බන්ධයෙන් එකී භික්ෂුව අයත් වන නිකාය පාර්ශවයේ නිර්දේශ හා නියමයන් පරිදි බන්ධනාගාර දෙපාර්තමේන්තුව කටයුතු කිරීම සුදුසු බව ත්‍රෛනිකායික මහානාහිමිවරුන් පෙන්වා දී ඇත.
එබැවින් අධිකරණ තීන්දුවට හා බන්ධනාගාර නීතිවලට බාධාවක් නොවන අයුරින් ඥානසාර හිමි බන්ධනාගාරය තුළ රැඳීසිටින කාලසීමාවේ භික්ෂූත්වයට අගතියක් නොවන අයුරින් කටයුතු කිරීමට අවකාස සලසා දෙන ලෙසත් ඉදිරි අධිකරණමය කටයුතු සඳහා ඉදිරිපත් කිරීමේදී අඛණ්ඩව භික්ෂුභාවයෙන් පෙනී සිටීමට අවශ්‍ය පරිපාලනමය පහසුකම් සලසාදීම සුදුසු බවත් බන්ධනාගාර කොමසාරිස් ජනරාල්වරයා වෙත යොමුකළ ලිපිය මඟින් වැඩිදුරටත් දැනුම් දී තිබුණි.