බන්ධනාගාරවල පවතින අධික තදබදය අවම කිරීමේ පියවර
www.bbcmirror.lk
www.Lankawebnews.lk
මාධ්‍යවේදීනි ෆාතිමා සෆාන්
අගෝස්තු සහ සැප්තැම්බර් මාස තුළදී මත්ද්‍රව්‍ය නඩුවලට අදාළ රජයේ රසපරීක්ෂක වාර්තා 17,506 ක් නිකුත්කර ඇති බව අධිකරණ සහ ජාතික ඒකාබද්ධතා අමාත්‍ය හර්ෂණ නානායක්කාර පැවසීය.
කුරුවිට බන්ධනාගාරයේදී පැවැති ඒකාබද්ධ යාන්ත්‍රණයක් ස්ථාපිත කිරීමේ වැඩසටහනකට අද (01) එක්වෙමින් අමාත්‍යවරයා සඳහන් කළේ, අගෝස්තු මාසයේදී මත්ද්‍රව්‍ය සම්බන්ධ වාර්තා 9,061 ක් සහ සැප්තැම්බර් මාසයේදී තවත් වාර්තා 8,445 ක් නිකුත් කර ඇති බවයි.
මෑත කාලයේ බන්ධනාගාර තුළින් වාර්තා වූ සිදුවීම් ස්වයංසිද්ධව සිදු වූ ඒවා නොවන බවත්, ඉන් සමහරක් බාහිර බලපෑම් නිසාත් තවත් සමහරක් අභ්‍යන්තර සාධක නිසාත් සිදු වූ ඒවා බවත් අමාත්‍යවරයා සඳහන් කළේය.
වසර 30 ක් හෝ 40 ක් තිස්සේ රට තුළ පැවැති පද්ධතියක් වෙනස් කිරීමට උත්සාහ කිරීමේදී ඊට ප්‍රතිරෝධයන් එල්ලවීම වැළැක්විය නොහැකි බවත්, නමුත් එවැනි ප්‍රතිරෝධයන් පැවතියද ප්‍රතිසංස්කරණ ඉදිරියටම ගෙන යා යුතු බවත් ඔහු අවධාරණය කළේය.
බන්ධනාගාර නිලධාරීන් සුළු පිරිසක් අතින් සිදුවන වැරදි ක්‍රියා නිසා මුළු බන්ධනාගාර සේවයටම චෝදනා එල්ල නොවිය යුතු බව පැවසූ ඇමැති නානායක්කාර, රඳවාසිටින්නන්ගේ සුබසාධනය සහ ගෞරවය ආරක්ෂා කිරීමේ වැදගත්කමද පෙන්වාදුන්නේය.
‘සිරකරුවෝද මනුෂ්‍යයෝය’ යන මූලධර්මය බන්ධනාගාර තාප්පවල ප්‍රදර්ශනය කර ඇති ප්‍රකාශයකට පමණක් සීමානොවිය යුතු බව පැවසූ ඔහු, රඳවා සිටින්නන්ගේ සුබසාධනය කෙරෙහි වැඩි අවධානයක් යොමුකිරීමෙන් බන්ධනාගාර තුළ පවතින ගැටලු රාශියක් අවම කරගත හැකි බවද පැවසීය.
පැරණි දූෂිත පද්ධතියේ නෙයෙක් අවශේෂයන් තවදුරටත් පැවතීමට ඉඩ නොතබා නව ක්‍රියාපටිපාටීන් හඳුන්වා දෙන බව අමාත්‍යවරයා වැඩිදුරටත් පැවසීය.
කුරුවිට බන්ධනාගාරයේ රක්ෂිත බන්ධනාගාරගතව සිටින පිරිස් සහ බන්ධනාගාර නිලධාරීන් හමු වී ඔවුන් මුහුණදෙන ගැටලු පිළිබඳව සාකච්ඡා කළ අමාත්‍යවරයා, මත්ද්‍රව්‍ය සම්බන්ධ වැරදි සම්බන්ධයෙන් රක්ෂිත බන්ධනාගාරගත කර සිටින පුද්ගලයන්ට ඇප ලබාගැනීමට හැකි වන පරිදි ගෙනයන වැඩපිළිවෙළ පිළිබඳවද එම රැඳවියන් දැනුවත් කළේය.
බන්ධනාගාර තුළ ඇතිවන හදිසි අවස්ථාවලදී ප්‍රාදේශීය මට්ටමින් රාජ්‍ය ආයතන අතර සම්බන්ධීකරණය පවත්වා ගැනීමට සහ රැඳවියන්ගේ සුබසාධන කටයුතු විධිමත් කිරීම සඳහා මෙම ඒකාබද්ධ යාන්ත්‍රණය ස්ථාපිත කරන ලදී.
පොලිසිය, බන්ධනාගාර දෙපාර්තමේන්තුව, ජාතික ජලසම්පාදන හා ජලාපවහන මණ්ඩලය, ගිනි නිවන හමුදාව, ලංකා විදුලිබල මණ්ඩලය සහ අනෙකුත් රාජ්‍ය ආයතනවල නිලධාරීහු මෙම වැඩසටහනට එක්ව සිටියහ